విశ్వంభర
విశ్వంభర వీణా తంత్రుల పై,
కాలమనే గీతాన్ని ఆలపించాను…
దిగ్దిగంతములు ఓంకార నాదాలతో నిండెలా…
భువనమోహన వేణువు పై,
వేదనాద స్వరాలు వినిపించాను…
ఈ విశ్వమంతా సమ్మోహనాస్త్రాలై కమ్ముకొనెలా…
కడలి ఒడిని ఒడిసిపట్టి,
అంతరంగ తరంగాల చీకట్లు చిలికి చిలికి,
విరజిమ్మాను ఈ భువనమంతా రత్నగర్భ రాసులని…
అరుణగిరి సువర్ణరేఖల అంచులపై,
సప్తాశ్వముల స్వర్ణరథం గూర్చి,
వీనిలాకాశమంత బంగారు కిరణాలతో నింపాను…
చంద్రచారికలను చేరి,
నిశ్శబ్ద నిశీథులను చీల్చి ,
చందనామృతాలు పంచాను లోకమంతా…
భువనైక మోహనమై,
సకల చరాచరుల ప్రాణమై…
ఉచ్శ్వాస నిశ్వాసల జీవమై…
జ్ఞానానంద పరంజ్యోతి మయమై… వెలుగొందు వేల్పునేను
- ఎం. మురళీ మోహన్
