🕊️ ఒక ఆశాకిరణం
జగన్నాథ రథచక్రాలై
శాంతికి జీవన సత్యాలై
ఉరుముల మెరుపుల గర్జనలై
చీకటి పొరలను చీల్చుకొని
వస్తున్నది వస్తున్నది అదిగదిగో ......🕊️
ఆకాశము అంచుల్లో,
భూదేవి చెరుగులలో,
ఉదయించే సూర్యుడిలా
జనియించే ప్రాణం ఒకటి —
జగతికి ఊపిరి పోసేందుకు
వస్తున్నది వస్తున్నది అదిగదిగో .......🕊️
ఉభయ సంధ్యల వెలుగులలో ,
తొలకరి చినుకుల శ్వాసల లో ,
వెన్నెల చలువల కాంతులలో
శాంతి కపోతమై మెరిసింది
ధాత్రికి ప్రాణం పోసేందుకు
వస్తున్నది వస్తున్నది అదిగదిగో .......🕊️
అవధులు లేని ఆలోచనలతో
ఎల్లలు ఎరుగని ప్రపంచంలో
రాక్షస క్రీడల రాజకీయాలలో
ఓలలాడే జీవన నౌకలను
ఆశల తీరం వైపు చేర్చేటందుకు
వస్తున్నది వస్తున్నది అదిగదిగో .......🕊️
ప్రతి యుద్ధం విధ్వంసానికి
ప్రతి పయనం పడమటికే
సాయం సంధ్యలలో శయనానికే.
ఆశ నిరాశల కౌగిలిలో విలవిలలాడే
జీవితాలలో వెలుగు నింపేందుకు
వస్తున్నది వస్తున్నది అదిగదిగో .....🕊️
-M.Murali Mohan, Advocate
